Share/Save

ᐁ ᐅᐦᑎᓂᒫᓱᐧᑖᐤ ᒉᐧᑳᔫᐦ

ᓇᓈᐦᑰ ᐁ ᐃᓯᓈᑯᓰᐦᑦ ᐊᓯᓃᐦ ᐊᓂᒌ ᐄᔨᔫᒡ ᑳ ᒌ ᐋᐸᒋᐦᐋᐧᑖᐤ ᑲᔦᐦ ᑖᓐ ᑳ ᐄᔑ ᐊᑎ ᐊᔮᐦᒋᐸᔨᔨᒡ ᒉᐧᑳᔫ᙮

ᐊᓂᔫᐦ ᒫᐅᒡ ᑳ ᓃᑳᓀᔨᐦᑖᑯᐦᐧᑳᐤᐦ ᒉᐧᑲᔫᐦ ᐊᓯᓃᔨᐦᒡ ᐁ ᒌ ᐆᐦᒋ ᐅᔑᐦᑖᑲᓄᐦᐧᑳᐤᐦ, ᓀᑌᐦ ᒫᒃ ᒥᐦᒉᐧᑖᐤ ᒋᔐᒥᑖᐦᑐᒥᑎᓄᐧᐁ ᐱᐳᓐᐦ ᐃᔥᐱᔥ ᔖᔥ ᒌ ᐯᒋ ᐃᐦᑖᐅᒡ ᒋᑖᓂᔅᒉᓰᒥᓄᐧᐃᒡ ᐆᔫ ᐊᔅᒌᔫ᙮ ᐆᑦᐦ ᒫᒃ ᓈᓂᑕᒻ ᐁ ᐃᐦᑕᑯᓂᔨᒡᐦ ᒉᐧᑳᔫᐦ ᒌ ᐋᐸᒋᐦᑖᐅᒡ, ᐆᒌ ᒫᒃ ᐄᔨᔫᒡ ᐅᓯᑌᐦ ᒌ ᐃᑌᔨᐦᑕᒥᐦᐄᑯᐧᐃᑦ ᐊᓯᓃᐦᒡ ᒉ ᒌ ᐅᐦᑎᓂᐦᐧᑳᐤᐦ ᒉᐧᑳᔫ, ᐁ ᒪᒦᔅᑯᑎᓂᒫᑑᐧᑖᐤ ᓀᔥᑦ ᐁ ᓂᑐᐧᐋᐸᐦᑎᐦᐧᑳᐤ ᐧᐋᐦᔫ ᐁ ᐅᑎᓂᐦᐧᑳᐤ᙮ ᐅᓯᑌᐦ ᐋ, ᐁ ᒌ ᒥᐧᔮᔒᔨᒡᐦ ᓀᔥᑦ ᒥᒄ ᑳ ᐃᐦᑕᑯᓃᐧᑫ ᐋᐦᒌᐅᐦ ᐆᐦᒋ᙮

ᐊᓂᑌᐦ ᒫᒃ ᒫᐅᒡ ᑳ ᒌᐦᑳᔦᔨᐦᑖᑯᓯᑦ ᒥᔅᑎᓯᓃ ᐧᐄᐧᓈᐱᔅᒄ ᒌ ᐃᔑᓂᐦᑳᑖᑲᓅ᙮ ᐁᐅᒄ ᐆ ᑳ ᐋᐸᒋᐦᐋᑲᓄᐧᐃᑦ ᐁ ᐅᔑᐦᑖᑲᓄᐦᐧᑳᐤᐦ ᒉᐧᑳᔫᐦ, ᓈᔥᒡ ᒫᒃ ᒌ ᒥᐧᔮᔔᐦ, ᐅᓯᑌᐦ ᒫᒃ ᔖᔥ ᓂᔮᐧᔮᒋᔐᒥᑖᐦᑐᒥᑎᓀᐧᐁ ᐱᐳᓐᐦ ᐃᔥᐱᔥ᙮ ᐊᓐ ᒫᒃ ᒥᔅᑎᓯᓃ ᐧᐄᐧᓈᐱᔅᒄ ᐊᓂᑌᐦ ᐆᐦᒋᐸᔫ ᐧᐋᐳᔔᑲᒥᒄ ᑎᒥᔅᑲᒦ ᓰᐲᐦᒡ᙮ ᐊᓂᒌ ᐄᔨᔫᒡ ᒫᑎᐦᐄᑲᓐᐦ ᐁ ᐊᔮᐱᔖᔒᒡ ᒌ ᐅᔑᐦᑖᐅᒡ ᑲᔦᐦ ᐊᑲᔅᑯᔥᑎᐧᑳᓐᐦ, ᐧᐄᓂᐯᑯᐦᒡ ᐁ ᒌ ᐆᐦᑎᓈᐧᑖᐤ ᐊᓯᓃᐦ, ᐁ ᒌ ᒥᔅᑯᐧᐋᐧᑖᐤ ᐆᑌᐦ ᐃᑌᐦᒉ ᓂᑳᐯᐦᐁᓅᑖᐦᒡ ᒉᐃᒥᔅ ᐯᐃ ᑲᔦᐦ ᐊᓐ ᓈᔅᑖᐧᐹᑳᐦ ᑳ ᐃᔑᓂᐦᑳᓱᑦ ᐊᓯᓃ ᐊᓂᑌᐦ ᐧᐄᓂᐯᑯᐦᒡ ᒌᐧᐁᑎᓅᑖᐦᒡ ᐃᑌᐦᒉ ᒌ ᒥᔅᑯᐧᐋᑲᓅ᙮


ᒋᔅᑯᑕᒫᓱᑦ, ᒋᔅᑯᑕᒫᑑᐊᐧᐋᔥ ᐁ  ᐅᔑᐦᑖᑦ ᒉᐧᑳᔫ ᐊᓯᓃᐦ ᐆᐦᒋ᙮

ᒋᔅᑯᑕᒫᓱᑦ, ᒋᔅᑯᑕᒫᑑᐊᐧᐋᔥ ᐁ ᐅᔑᐦᑖᑦ ᒉᐧᑳᔫ ᐊᓯᓃᐦ ᐆᐦᒋ᙮

ᐊᓂᑌᐦ ᑳ ᐆᐦᑎᓈᐧᑖᐤ ᐊᓂᔫ ᐊᓯᓃ ᑳ ᐋᐸᒋᐦᐋᐧᑖᐤ ᐁ ᐅᔑᐦᑖᐧᑖᐤ ᒉᐧᑳᔫᐦ᙮